Kandidati për kryetar të Komunës së Çairit, Bujar Osmani, kritikoi ashpër keqpërdorimin e mjeteve publike në komunë, duke e krahasuar çmimin për mbushjen e gropave me atë në Komunën Qendër.
“Një gropë, shikoni një akt në rrugë, një gropë e mbuluar me kushte 50 cm. E dini sa është tenderi që e ka nënshkruar komuna? 72.000 denarë. Është mbuluar një gropë. E dini sa kushton në Komunën Qendër? 5.000-6.000 denarë”, tha Osmani para qytetarëve.
Ai shtoi se ky është vetëm një shembull se si, sipas tij, “komunën e kanë trajtuar si bandë, duke marrë edhe denarin e fundit”.
“Këtë dua ta ndryshoj”, theksoi Osmani, duke shtuar se qytetarët nuk kërkojnë vetëm fytyra të reja në politikë, por një ndryshim rrënjësor në mënyrën e qeverisjes.
“Sepse qytetarët nuk kërkojnë ndërrim të politikanëve. Ata kërkojnë ndërrim të kulturës së funksionimit dhe qeverisjes. Kërkojnë ndershmëri, kërkojnë disiplinë, kërkojnë përkushtim për nevojat e tyre,” tha Osmani.
