Sot pata nderin të jem në fshatin heroik Shqiponjë (ish-Jabllanicë), për të shënuar 26-vjetorin e çlirimit të tij dhe për tu përkulur me respekt e mirënjohje të përjetshme për 43 dëshmorët që ranë për liri në këtë vatër të rezistencës.
Jabllanica, Gllogjani dhe Prekazi nuk ishin thjesht fshatra- ishin fortesa të lirisë, shtylla kurrizore e luftës së Ushtrisë Çlirimtare të Kosovës, që i tregoi botës se populli shqiptar nuk përkulet para padrejtësisë dhe pushtimit.
Në këtë vend ku djemtë dhe vajzat e kombit u flijuan për të drejtën, për flamurin, për identitetin dhe për të ardhmen tonë europiane, kujtimi për ta nuk është vetëm ceremoni- është obligim kombëtar dhe politik.
Ne nuk do ta lejojmë kurrë që sakrifica e tyre të zbehet nga harresa apo të relativizohet nga ata që sot përpiqen ta rishkruajnë historinë sipas interesave të ditës.
Kjo tokë u çlirua me gjakun e më të mirëve tanë. Dhe përgjegjësia jonë politike është ta mbrojmë atë gjak me dinjitet, me guxim dhe me vendosmëri – në Prishtinë, në Shkup, në Tiranë e në çdo tryezë ndërkombëtare ku flitet për të ardhmen tonë.
Lavdi e përjetshme dëshmorëve të Jabllanicës!
Lavdi UÇK-së!
Lavdi kombit shqiptar!
