Zëvendëskryeministri i parë, një prej liderëve të VLEN-it, Izet Mexhiti pret që ASH-ja e Arben Taravarit sonte ta sqarojë brenda vetes dilemën dhe ta informojë koalicionin VLEN se cilën rrugë e zgjedhin.
“Ta sqarojnë me vetveten a janë pjesë e VLEN-it apo shkojnë me BDI-në”, tha Izet Mexhiti.
Uroi që ASH-ja të reflektojë.
“Nëse tash dikush e analizon situatën, e vetmja mundësi për rikthim të BDI-së në qeveri është përçarja e VLEN-it. Në këtë situatë kanë kontribuar edhe qarqe nga jashtë”, tha Mexhiti.
Duke rikujtuar përvojat nga e kaluara, Mexhiti u shpreh se përçarja e shqiptarëve në më shumë taborë, vetëm e defaktorizon votën shqiptare. E që VLEN-i të qëndrojë i bashkuar, Mexhiti tha se kanë shkuar në maksimum me oferta ndaj ASH-së për ndarjen e komunave.
“E kemi favorizuar ASH-në, që z.Taravari edhe deklaron në media që më kanë ofruar 35%. Ne deri më sot nuk jemi marrë se çfarë do të marrë LD-ja apo tjerat, por kemi folur vetëm për ta favorizuar Aleancën që të mbetet VLEN-i i bashkuar”, deklaroi Mexhiti.