Ministri për Transformimin Digjital, Stefan Andonovski, në një pyetje të gazetarëve për “360 gradë”, theksoi se ligji është i qartë dhe thotë se çdo dokument elektronik që është përpunuar nga një organ shtetëror mund të përdoret në formën e tij të shtypur, po ashtu si dokumenti origjinal.
Ne supozojmë se mund të ketë kundërshtim ose mungesë njohurie nga disa institucione, prandaj kemi një qasje të dyfishtë: njëra, ku do t’u shpjegojmë institucioneve se si të pranojnë dokumentet, dhe tjetra, po përgatisim një udhëzim për qytetarët se si të mbrojnë të drejtat e tyre, në rast se nuk mund të veprojnë, për të ditur cilët janë hapat që mund të ndjekin, nëse duhet të veprojnë në vend ose të kontaktojnë ministrinë tonë,” tha Andonovski.
Ministri shtoi se këtë vit do të bëhet një përpjekje për të licencuar një numër të caktuar inspektorësh, dhe ata do të jenë pjesë e një sektori brenda ministrisë, ndërsa nëse ka nevojë, do të formohet edhe një inspektorat.
“Do të kërkohet kohë më e gjatë, që do të thotë se gjatë vitit 2025 do të bëjmë një përpjekje për të licencuar sa më shpejt një numër të caktuar inspektorësh. Ata do të funksionojnë si një sektor brenda ministrisë, dhe nëse shfaqet nevoja për të rritur detyrat e tyre, atëherë do të mendojmë edhe për një inspektorat të veçantë, por do të kenë brenda Ministrisë për Transformimin Digjital të gjitha kompetencat që do t’u caktohen nga sistematizimi i ri, i cili gjithashtu ka hyrë në fuqi më 1 janar, dhe tashmë kemi filluar me trajnimin e personelit,” përfundoi ministri Andonovski.