Si ministre e Arsimit, nuk mund të lejoj të vuajnë pesë ligje të tjera, sepse BDI-së nuk i pëlqen një ligj – të këndohet himni kombëtar”, tha ministrja e Arsimit Vesna Janevska për “Slloboden Peçat”.
Himni kombëtar nuk do të këndohet në fillim dhe në fund të vitit shkollor dhe në patronazhet e shkollave, për shkak se Qeveria e tërhoqi projektligjin për arsimin e mesëm pasi pati bllokadë ndaj tij.
Ministrja e Arsimit, Vesna Janevska, thotë se nuk heq dorë nga respektimi i simboleve shtetërore dhe se do të kërkojë ende një mënyrë për të funksionuar në një shoqëri multietnike. Nga ana tjetër, VLEN në pushtet, tërheqjen e Projektligjit e vlerësoi si sukses të saj, sikurse edhe BDI-ja.
Janevska njoftoi se ligji do të përmirësohet dhe se po mendohet se si të zgjidhet respektimi i simboleve shtetërore.
“Himni është simbol i shtetit. Si do ta zgjidhim, do të pajtohemi, por ka edhe ligj për simbolet e shtetit, kështu që ndoshta do t’i përkushtohemi edhe atij ligji”, tha Janevska.
