Dje, në Berlin filloi panairi më i madh i tregtar shqiptar “Global Albanian Gastronomy Festival”.
Inaugurimi i këtij panairi ishte një ngjarje madhështore, e cila tërhoqi më shumë se 1000 vizitorë dhe ekzibitorë, dhe mbi të gjitha bëri bashkë shqiptarë nga të gjithë trevat dhe gastronomë nga e gjithë bota për të treguar potencialin tonë kulturor dhe ekonomik.
Teksa në Berlin pritet 10 vjetori i “Open Ballkan”, 110 kompani ekzibitore nga Shqipëria, Kosova, Maqedononia e Veriut dhe Mali i Zi treguan se janë gati për tregun evropian me produktet dhe shërbimet e tyre cilësore. GAG Festival, përgjatë 2 dhe 3 tetorit, përvec panairit tregtar do të ketë 50 panelistë, 10 cooking show, 1 mbrëmje gala dhe një ceremoni të ndarjes së cmimeve.
Inaugurimi u nderua me praninë e figurave të rëndësishme politike shtetërore, të cilët ndanë mesazhe frymëzuese për potencialin e gastronomisë shqiptare dhe impaktit të saj në gastro-diplomaci dhe gastro-turizëm.
Ndër ta ishin znj. Vjosa Osmani, Presidente e Republikës së Kosovës; z. Florian Hauer, Sekretar Permanent për Çështje Federale dhe Evropiane në Shtetin e Berlinit, z. Igli Hasani, Ministër për Evropën dhe Punët e Jashtme i Republikës së Shqipërisë. z. Izet Mexhiti, Zëvendës Kryeministër i Maqedonisë së Veriut; znj. Rozeta Hajdari, Ministre e Industrisë, Ndërmarrësisë dhe Tregëtisë në Republikën e Kosovës.
Pas fjalimeve frymëzuese, dita vazhdoi me katër panele të ndryshme që trajtuan tema të rëndësishme për “Agroturizmin Shqiptar – mundësitë për të investuar në Shqipëri dhe Kosovë”, për “Potencialin Kapitalit të Diasporës Shqiptare në Zhvillimin e Ballkanit Perëndimor”, për Historitë Frymëzuese të Gastronomëve Shqiptar kudo në botë.
Një vëmendje e veçantë iu kushtua shkollave profesionale, të cilat luajnë një rol kyç në formësimin e të ardhmes së sektorit të gastronomisë shqiptare. Në një skenë paralele kuzhinjerë të ndryshëm nga trevat shqiptare performonin “Cooking Shows”. Gjithashtu, u inagurua edhe në Berlin, gati për t;i eksportuar jashtë vendit edhe Bar’i Modular i gjithi “ Made in Kosova”.
Ky panair jo vetëm që promovoi kuzhinën shqiptare, por gjithashtu e shndërroi Berlinin në një qendër të kulturës dhe traditave shqiptare për një ditë, duke e bërë atë të flasë shqip.
Ky festival ishte një dëshmi e pasurisë kulturore shqiptare dhe një mundësi e shkëlqyer për të festuar identitetin tonë në një skenë ndërkombëtare.
