Sot, Drejtori i Medresesë “Isa Beu”, Dr. Islam ef. Islami, ishte pjesë e delegacionit të Bashkësisë Fetare Islame të Republikës së Maqedonisë së Veriut që, nën udhëheqjen e Kryetarit të saj, Reisul Ulemasë H. Hfz. Shaqir ef. Fetahut, mirëpriti Imamin e Qabes, ekselencën e tij, Shejh Dr. Mahir Muaikali, i cili po qëndron në vendin tonë si mysafir i nderuar i BFI-së.
Pritja qendrore në Shkup u realizua nën nikoqirllëkun e Myftiut të Shkupit, Dr.Qenan ef. Ismaili, ku u zhvilluan aktivitete të rëndësishme fetare dhe takime vëllazërore.
Vizita e Imamit të Qabes po realizohet sipas një agjende të pasur dhe shumëdimensionale, e cila filloi dje në Kumanovë, sot vazhdoi në Shkup me faljen e namazit të Xhumasë në xhaminë historike të Mustafa Pashës, për të vazhduar më tej në Gostivar dhe në Tetovë. Në çdo qytet, mysafiri u prit me nderime të veçanta, u organizuan tubime frymëzuese dhe takime me përfaqësues të institucioneve fetare, arsimore dhe kulturore.
Pjesëmarrja e Drejtorit të Medresesë “Isa Beu” në këtë delegacion dëshmon edhe njëherë rolin e rëndësishëm të këtij institucioni në jetën fetare dhe arsimore të vendit, si dhe angazhimin e tij të vazhdueshëm në forcimin e vlerave islame dhe lidhjeve me botën myslimane.
Kjo vizitë e lartë fetare mbetet një ngjarje historike dhe e paharrueshme për vendin tonë, duke përcjellë mesazhe të fuqishme uniteti, vëllazërie dhe përkushtimi në shërbim të fesë dhe shoqërisë.
