Ministri i Arsimit, Jeton Shaqiri njofton se rritja e pagave për 22% nuk është vetëm për stafin akademik të Universitetit “Shën Kiril dhe Metodi”, por do të vlejë për të gjithë universitetet.
Shaqiri për “TV21” tha se rritja do të vlejë për të gjithë të punësuarit në të gjitha universitetet shtetërore, por që të njëjtat duhet të nënshkruajnë marrëveshjet kolektive.
“Do vlejë për të gjithë pas firmosjes së marrëveshjeve kolektive me themeluesit, do të thotë me Parlamentin e vendit. Shpresoj që t’i firmosin marrëveshjet”, tha mes tjerash Shaqiri.
Ndërkaq sa i takon publikimit të marrëveshjes së UShKM-së, Shaqiri u sqarua se është publikuar ajo marrëveshje “sepse ajo është firmosur”.
Përndryshe, marrëveshja parasheh gjithsej 3 mijë profesorë, asistentë, administratorë dhe persona teknikë, duke filluar nga ky muaj do të marrin rrogë më të lartë për 22%.
Në marrëveshjen e nënshkruar më 29 dhjetor të 2022, por zbatimin e fillon nga 1 janari i 2024, parashihet edhe një rritje tjetër që do të fillojë nga muaji mars.