Policia e Shtetit ka dhënë informacion zyrtar për krimin në familje në Tiranë, ku 37-vjeçarja Amanda Pushani u vra me thikë në banesën e saj. Autoritetet thonë se fillimisht familjarët…
Policia e Shtetit ka dhënë informacion zyrtar për krimin në familje në Tiranë, ku 37-vjeçarja Amanda Pushani u vra me thikë në banesën e saj.
Autoritetet thonë se fillimisht familjarët kanë raportuar se vdekja ka qenë për shkaqe natyrale, por kryerja e autopsisë ka zbuluar se Amanda Pushani është goditur më thikë dhe për pasojë ka humbur jetën.
Për ngjarjen është arrestuar e motra, e cila dyshohet si autore e krimit. Krimi në familje është regjistruar në rrugën “Hajdar Hidri” në kryeqytet.
Njoftimi i policisë:
Ditën e djeshme, rreth orës 11:40, është marrë njoftim se në rrugën “Hajdar Hidri”, shtetasja Amanda Pushani 37 vjeçe, kishte ndërruar jetë dyshohet për shkaqe natyre. Pas marrjes së njoftimit, Shërbimet e Policisë kanë kaluar menjëherë në vendngjarje, dhe pas konstatimit të trupit të pajetë të shtetases A. P., 37 vjeçe, e cila fillimisht është raportuar si vdekje natyrale nga familjarët, kanë vijuar veprimet hetimore të thelluara në lidhje me rastin, për të bërë të mundur zbardhjen e rrethanave të ngjarjes.
Pas kryerjes së autopsisë ka rezultuar se shtetasja 37 vjeçe, ka ndërruar jetë si pasojë e plagëve të marra nga një mjet prerës.
Në vijim të veprimeve, specialistët e Sektorit për Hetimin e Krimeve të Rënda arrestuan shtetasen Marsela Pushani 40 vjeç, (motrën e saj), banuese në Tiranë, për veprën penale “Vrasja për shkak të marrëdhënieve familjare”, pasi ditën e djeshme, gjatë një konflikti ka goditur me mjet prerës shtetasen Amanda Pushani, e cila si pasojë e plagëve të marra, ka ndërruar jetë.
Materialet i kaluan Prokurorisë pranë Gjykatës së Shkallës së Parë të Juridiksionit të Përgjithshëm Tiranë, për veprime të mëtejshme procedurale.
