Mënyra se si Maqedonia e Veriut vazhdon ta trajtojë Bullgarinë sigurisht që nuk është rruga për integrimin e saj më të shpejtë në BE, tha ministri bullgar i Punëve të Jashtme, Ivan Kondov.
Sipas Radios Kombëtare Bullgare (BNR), pas takimit të djeshëm jozyrtar të krerëve të diplomacisë së vendeve anëtare të BE-së dhe vendeve të Ballkanit Perëndimor, Kondov deklaroi se është jashtëzakonisht e rëndësishme që vendi të zbatojë obligimet e marra.
“Disa kolegë ngritën çështjen e një zgjerimi më të shpejtë apo të një rruge më të shpejtë. Natyrisht, nga ana jonë theksova se është jashtëzakonisht e rëndësishme që të zbatohen të gjitha obligimet, përfshirë edhe ndryshimin e Kushtetutës”, tha Kondov.
Ai shtoi se përmendja e Bullgarisë në një kontekst të caktuar, siç është deklarata e kryeministrit Dimitar Kovaçevski, i cili e krahasoi qëndrimin e Sofjes ndaj vendit me atë të Rusisë ndaj Ukrainës, si dhe “shkelja e të drejtave të njeriut, nuk janë mënyra e integrimit më të shpejtë të Maqedonisë së Veriut”.
Në pyetjen e një gazetari nëse ky qëndrim bullgar u “kuptua” nga ministrat e tjerë pjesëmarrës në takim, Kondov u përgjigj se “në çdo rast, shumë vende thanë se BE-ja është një aleancë e bazuar në vlera dhe të gjitha kërkesat për integrim evropian duhet të plotësohet”.
Kondov informon edhe se ka pasur bisedë dypalëshe me shefin e diplomacisë sonë Bujar Osmani, nga i cili ka kërkuar sqarim për deklaratën e kryeministrit Kovaçevski.
“Ai u përpoq të shpjegonte se deklarata e kryeministrit de fakto lidhet me politikanë të veçantë dhe jo në parim me politikën e Bullgarisë, por unë e pyeta pse përmendet Bullgaria në atë situatë dhe jo politikani specifik të cilit i referohet”, tha Kondov.
Duke iu drejtuar debatit të përgjithshëm në Samitin e Këshillit të Evropës në Rejkjavik, të titulluar “Të bashkuar për Evropën” javën e kaluar, kryeministri Kovaçevski theksoi se diskursi i përdorur në Bullgari ndaj Maqedonisë së Veriut është shumë i ngjashëm me diskursin e përdorur nga Federata Ruse ndaj Ukrainës.
Ai shtoi se akuzat e bëra në Samit nga përfaqësuesi i Bullgarisë janë krejtësisht të pabaza dhe vijnë nga një vend që nuk respekton vendimet e Gjykatës Evropiane për të Drejtat e Njeriut dhe standardet e Këshillit të Evropës në fushën e të drejtave të njeriut.
“Është e papranueshme akuzat e tilla të keqpërdoren për qëllime politike, veçanërisht në këtë periudhë vendimtare për të ardhmen e Evropës. Maqedonia e Veriut njihet ndërkombëtarisht si një shoqëri funksionale moderne multietnike ku respektohen të gjitha të drejtat. Të gjitha raportet e konfirmojnë këtë”, theksoi Kovaçevski.