Dy ditë para gjyqit në Hagë, kryeministri Edi Rama i ka dalë sërish në mbrojtje ish-Presidentit të Kosovës, Hashim Thaçi.
Rama shkruan në Twitter se “a duhet të konsiderohen kriminelë ata që e çojnë popullin e tyre drejt lirisë kundër regjimeve brutale” dhe se Thaçi dikur u përshëndet si George Washington i Kosovës. nga vetë Biden.
“A duhet të konsiderohen kriminelë ata që e çojnë popullin e tyre drejt lirisë kundër regjimeve brutale? Është një mendim shqetësues, veçanërisht duke pasur parasysh se njeriu në këtë foto dikur u përshëndet si George Washington i Kosovës nga vetë Joe Biden!”- shkruan Rama në Twitter.
Are those who lead their people towards freedom against brutal regimes now to be considered criminals? It’s a concerning thought, especially considering the man in this photo was once hailed as the George Washington of Kosovo by Joe Biden himself! https://t.co/w5sEiAI8Nc
— Edi Rama (@ediramaal) April 1, 2023
Reagimi vjen dy ditë para fillimit të gjykimit ndaj ish-drejtuesve të Ushtrisë Çlirimtare të Kosovës, Hashim Thaçi, Kadri Veseli, Jakup Krasniqi dhe Rexhep Selimi. Procesi ndaj tyre pritet të fillojë të hënën me 3 prill në Gjykatën e Posaçme me seli në Hagë.
Ish drejtuesit e Ushtrisë Çlirimtare të Kosovës, Hashim Thaçi, Kadri Veseli, Jakup Krasniqi dhe Rexhep Selimi, u arrestuan në nëntor të vitit 2020. Prokuroria e Posaçme e Kosovës me seli në Hagë, i ngarkon ata për veprat përndjekje dhe burgosje, ndalim arbitrar, akte të tjera çnjerëzore, trajtim mizor, torturë, vrasje, dhe zhdukje me forcë të personave. Sipas prokurorisë, krimet e pretenduara prej saj, janë kryer midis afërsisht prillit të vitit 1998 dhe gushtit të vitit 1999 në një numër vendndodhjesh në Kosovë dhe Shqipëri.
Top Channel
