Shpëtim Duro është prezantuar sot si trajneri i ri i skuadrës së Strugës.
Tekniku kryeqytetas ka lënë Shqipërinë për t’u kthyer në Maqedoninë e Veriut ku edhe më parë ka drejtuar ekipin e Shkëndijës së Tetovës.
Trajneri ishte pa skuadër pas shkarkimit nga Egnatia dhe ka pranuar ofertën e Strugës, e cila vazhdon të kryesojë kampionatin, por me rezultatet e fundit kishte zhgënjyer disi duke i dhënë mundësinë ndjekësve të afroheshin, ndaj u mor vendimi për ndryshimin e trajnerit.
Klubi ka konfirmuar se Duro ka firmosur deri në fund të sezonit të ardhshëm me skuadrën liqenore.
NJOFTIMI I KLUBIT
Shpëtim Duro, trajneri i ri i ekipit
Të mërkurën (01.03.2023), patëm nderin të mirëpresim profesorin Shpëtim Duro, në detyrën e tij të re si trajner i ekipit të FC Struga.
E prezantuam me ambientet, infrastrukturën, lojtarët, stafin teknik dhe kryesinë e klubit, duke u munduar t’ja bëjmë sa më të lehtë fillimin me misionin e tij të ri.
Duro u shpreh i kënaqur me potencialin njerëzor dhe sportiv të klubit.
Duro ka një karrierë të gjatë me klube ku ka drejtuar, KF Partizani, Vllazninë, Skënderbeun e Korçës, Shkëndijën etj.
Bashkëpunimi ynë me të është kontraktuar deri në fund të sezonit 2023-2024.
Në bankinën e stafit teknik si asistent i prof. Shpëtim Duros do të rikthehet trajneri Meriton Gega.