Është arrestuar sulmuesi i dytë i Hristijan Pendikov, sekretarit tË klubit bullgar “Car Boris Treti”, i cili u rrah muajin e kaluar në Ohër.
Bëhet fjalë për një person nga Manastiri, i dyshuar i cili është ndaluar nga policia e Ohrit. Sipas informacioneve fillestare ai dyshohet për lëndim të rëndë trupor.
“Më datë 21.02.2023, në ora 17, zyrtarë policorë nga RSV Ohër kanë privuar nga liria B. A. (23) nga Manastiri. Ai ishte në kërkim me urdhër qendror për shkak të ekzistimit të shkaqeve të dyshimit për kryerjen e veprës penale të lëndimit të rëndë nga neni 131 i Kodit Penal. Ai është ndaluar në stacionin policor dhe do t’i dorëzohet PPSH kompetente”, thuhet në raportin e MPB-së.
Paraprakisht, sipas fondacionit bullgar “Maqedonia”, bëhej fjalë për Borçe Angelov nga Manastiri.
Ilija Spaseski, sulmuesi i parë i arrestuar i Pendikovit, nga dje nuk është më në paraburgim. Seanca gjyqësore për të është caktuar më 28 shkurt.
