Presidenti i Kinës Xi Jinping bëri thirrje të martën për zgjidhje të duhur të çështjes bërthamore të Iranit, ndërsa shprehu mbështetjen e tij për Republikën Islamike në mbrojtjen e të drejtave dhe interesave të saj, sipas mediave shtetërore kineze.
Kina do të vazhdojë “të marrë pjesë në mënyrë konstruktive” në bisedimet për të rifilluar negociatat për zbatimin e marrëveshjes bërthamore të Iranit, i tha Xi presidentit të Iranit Ebrahim Raisi në bisedimet në Pekin.
Një marrëveshje bërthamore e vitit 2015 kufizoi programin e pasurimit të uraniumit të Iranit për ta bërë më të vështirë për Teheranin zhvillimin e armëve bërthamore, në këmbim të heqjes së sanksioneve ndërkombëtare.
Por në vitin 2018, presidenti i atëhershëm i SHBA-ve, Donald Trump hoqi dorë nga marrëveshja, duke thënë se ajo nuk kishte bërë mjaftueshëm për të frenuar aktivitetet bërthamore të Teheranit dhe rivendosi sanksionet.
Kina ka kritikuar Washingtonin për tërheqjen nga marrëveshja dhe këmbëngul se Shtetet e Bashkuara duhet të bëjnë hapin e parë në ringjalljen e paktit, raporton Reuters.
Në shtator, Shtetet e Bashkuara vendosën sanksione të reja ndaj kompanive të përfshira në eksportet e naftës iraniane, duke përfshirë pesë me bazë në Kinë.
Washingtoni tha se do të vazhdojë të zbatojë sanksionet mbi shitjet e naftës së Iranit për sa kohë që Teherani vazhdon të përshpejtojë programin e tij bërthamor.