Myrto Uzuni sonte shënoi dy gola ndaj Tenerifes, që ishte hera e pestë që shënon dy herë në ndeshje në Ligën e dytë spanjolle, duke veshur edhe njëherë kostumin e Superheroit të Granadës.
Sulmuesi i Kombëtares shqiptare ishte protagonist absolut në suksesin e katërt radhazi për bardhekuqtë dhe ka marrë “arratinë” në renditjen e golashënuesve duke u ngjitur në kuotën e 17 golave.
Në fundin e ndeshjes së sotme, talenti beratas u vlerësua me notën 8.2 nga faqja e specializuar e statistikave “Sofa Score”, duke rezultuar padyshim lojtari më i mirë në fushë. Të tria gjuajtjet e Uzunit ishin në kuadrat, ndërkohë që ai fitoi gjithashtu edhe një nga dy penalltitë e sfidës.
Përveç pesë dygolëshave të realizuara në këtë sezon, vlen të theksohet fakti se sulmuesi shqiptar ka shënuar edhe një het-trik, atë ndaj Villarrealit B.
