Nënkryetari i Kuvendit të Malit të Zi, Nikollë Camaj, e ka vlerësuar zgjedhjen e Justina Shiroka-Pulës në postin e Presidentes së Kosovës si një moment të rëndësishëm për vendin dhe institucionet e saj.
Sipas Camajt, kjo zgjedhje nuk mund të konsiderohet një zhvillim i zakonshëm, por një ngjarje me peshë të veçantë, veçanërisht në një periudhë kur Kosovës i nevojiten stabilitet institucional, përgjegjësi dhe përkushtim ndaj interesit të qytetarëve.
“E njoh Justina Shiroka-Pulën edhe personalisht dhe kam pasur fatin të njoh nga afër përkushtimin e saj dhe kontributin që ka dhënë ndër vite në jetën publike. Si një akademike dhe personalitet me përvojë, ajo i ka kushtuar një pjesë të rëndësishme të jetës së saj së mirës së Kosovës”, është shprehur Camaj.
Ai ka theksuar se zgjedhja e saj në krye të shtetit përfaqëson një përgjegjësi të madhe dhe një mundësi që institucionet e Kosovës të vazhdojnë punën me seriozitet, stabilitet dhe vizion për të ardhmen.
“Uroj që kjo periudhë e re institucionale të sjellë më shumë stabilitet dhe bashkëpunim, si dhe të forcojë besimin e qytetarëve në institucionet e Republikës së Kosovës. Në këto momente, më shumë se kurrë, nevojiten përgjegjësi, maturi dhe përkushtim ndaj interesit shtetëror dhe të ardhmes së vendit”, ka deklaruar Nënkryetari i Kuvendit të Malit të Zi, Nikollë Camaj.
Në fund, Camaj i ka uruar Presidentes së re të Kosovës sukses në ushtrimin e detyrës së saj, duke shprehur besimin se institucionet e Kosovës do të vazhdojnë të punojnë në funksion të stabilitetit, zhvillimit dhe perspektivës evropiane të vendit.
🇽🇰 🇲🇪
Ja postimi plotë:
Zgjedhja e Presidentes ë Kosovës, z. Justina Shiroka-Pula, nuk mund të përkufizohet si një zhvillim i zakonshëm, por tejet i veçantë, sa për faktin se Kosova doli nga një periudhë krize përmes zgjedhjes së kryetares, po aq edhe për personin që zgjedhi.
E njohur si një akademike e veçantë, e që kam pasur fatin ta njoh edhe personalisht, tërë jetën dha kontributin e vet në jetën publike, për të mirën e përjetshme të Kosovës sonë.
Prandaj, zgjedhja e saj për Presidente është një moment i rëndësishëm që institucionet të vazhdojnë punën me përgjegjësi, stabilitet dhe në interes të së ardhmes së Kosovës.
