Ekipi i dokumentarit nga “Feniks Studios” nga Franca, i udhëhequr nga Dhia Ben Naser, qëndrojnë në vizitë te Xhamia e Larme në Tetovë nga data 18 deri më 21 tetor 2024, për të xhiruar dokumentarin e titulluar “Xhamitë e Papritura”. Ky projekt ka për qëllim të nxjerrë në pah rëndësinë kulturore dhe arkitekturën unike të xhamive në shoqëritë islame anembanë botës.
Dokumentari, i cili ka përmasa globale, gjithashtu synon të zbulojë xhamitë historike që kanë një rëndësi të madhe në zhvillimin e vlerave shoqërore dhe fetare të vendit ku ndodhen.
Ekipi u mirëprit nga sekretari i Myftinisë së Tetovës, Semir Fazliji, dhe imami i xhamisë së Pashës, Mr. Emir Kasami, të cilët gjithashtu siguruan mbështetje të parezervë për këtë projekt që rrit vlerat e Xhamisë së Larme dhe kontribuon në zhvillimin e turizmit në Tetovë dhe në Maqedoninë e Veriut në përgjithësi.
