Me ftesë të Ambasadorit të Bashkimit Evropian në Republikën e Maqedonisë së Veriut, Rektori i Universitetit të Tetovës, Prof. Dr. Jusuf Zejneli, mori pjesë në ceremoninë solemne të organizuar me rastin e 9 Majit – Ditës së Evropës. Në këtë ngjarje ishin të pranishëm personalitete të larta nga jeta politike, akademike, diplomatike dhe shoqërore e vendit.
Në atmosferën solemne të organizuar nga Delegacioni i Bashkimit Evropian, u theksua rëndësia e ruajtjes së paqes, stabilitetit, bashkëpunimit dhe perspektivës evropiane për vendet e rajonit. Në këtë frymë, Universiteti i Tetovës mbetet i përkushtuar në avancimin e partneriteteve ndërkombëtare, pjesëmarrjen në programe evropiane dhe krijimin e mundësive të reja për studentët dhe stafin akademik.
Universiteti i Tetovës, si një institucion i rëndësishëm i arsimit të lartë në vend, prej vitesh është pjesë veprimtarive që e shënojnë Ditën e Evropës, qoftë si organizator, bashkë -organizator apo pjesëmarrës në iniciativa që nxisin frymën evropiane dhe integrimin akademik në hapësirën universitare evropiane.
