Një tjetër skandal trondit opinionin publik dhe rëndon akoma më shumë bilancin e keqmenaxhimit të Komunës së Tetovës nga kryetari aktual Bilall Kasami. Portali ynë ka siguruar të dhëna ekskluzive nga portali Open Finance që dëshmojnë se Xhevat Xhemaili, militant i përkushtuar i Lëvizjes Besa përfiton pagë mujore prej 90.000 denarë (rreth 1.500 euro) nga buxheti komunal, pa kryer asnjë punë konkrete për komunën e Tetovës.
Ironia bëhet edhe më madhe kur dihet se Xhevat Xhemaili nuk ndodhet fare në Maqedoninë e Veriut, por në një shtet evropian, ndërkohë që buxheti i Komunës përdoret për t’i mbuluar pagën si të ishte në marrëdhënie të rregullt pune.
Kjo formë e shpërdorimit të mjeteve publike, përmes të ashtuquajturave “kontrata në vepër”, të cilat në këtë rast nuk përfaqësojnë asnjë “vepër”, jo vetëm që është e pamoralshme, por ngre dyshime të forta për vepër penale, pasi bëhet fjalë për dëm të drejtpërdrejtë të buxhetit komunal dhe taksapaguesve tetovarë.
Duhet rikujtuar se Bilall Kasami, në fushatën e tij zgjedhore u zotua se do t’i japë fund praktikave të tilla, duke premtuar transparencë dhe punësim mbi bazë merite. Por sot, realiteti flet ndryshe, më shumë se 2 milionë euro nga buxheti i Komunës së Tetovës ndahen për militantë dhe logjistikë partiake të Lëvizjes Besa.
Kush do të mbajë përgjegjësi për këtë formë të paturpshme të keqpërdorimit të parasë publike? Dhe më rëndësishmja, a do të veprojë prokuroria për të ndalur dhe sanksionuar këtë zhvatje të organizuar të buxhetit komunal?
