Prokuroria Themelore Publike në Shkup ka hapur procedurë hetimore ndaj një 30-vjeçari nga Shkupi, i cili dje gjatë një zënke familjare vrau me thikë babanë e tij. Djali i ka shkaktuar babait 30 plagë me thikë në qafë dhe në gjoks, njoftoi sot Prokuroria Publike, e cila ka kërkuar masën e paraburgimit për të dyshuarin.
”I dyshuari 30-vjeçar, më 12 korrik, me dashje i ka marrë jetën babait të tij. Pasi në shtëpi ka pasur një zënkë dhe sulm fizik mes babait dhe nënës së të dyshuarit, djali ka marrë një thikë dhe e ka sulmuar babanë në oborr, duke i shkaktuar më shumë se 30 goditje në qafë dhe gjoks.
Babai ka ndërruar jetë në vendngjarje”, thuhet në njoftimin e prokurorisë.
Gjatë procedurës hetimore, prokurori publik do të ndërmarrë disa veprime me qëllim të përcaktimit të saktë të motiveve të ngjarjes, si dhe do të kryhet një ekspertizë psikiatrike për të dyshuarin.
Në opinion tashmë kanë qarkulluar disa spekulime për gjendjen e mundshme mendore të të dyshuarit. Disa media, duke iu referuar burimeve nga hetuesia, kanë raportuar se ai dyshohet se e konsideronte veten profet dhe u impononte bindjet e veta njerëzve të afërt. Këto informacione deri më tani nuk janë konfirmuar zyrtarisht nga institucionet kompetente.
Sipas informacioneve të mëparshme nga Ministria e Punëve të Brendshme, tragjedia ka ndodhur pas një zënke familjare në shtëpi. Informatat fillestare janë se babai 52-vjeçar, i cili dyshohet se ka qenë nën ndikimin e alkoolit, ka sulmuar fizikisht bashkëshorten e tij, pas së cilës djali i tyre ka ndërhyrë me thikë.
Trupi i pajetë i viktimës është dorëzuar për obduksion, ndërsa i dyshuari ndodhet në mbajtje në pritje të vendimit të gjykatës për masën e paraburgimit të kërkuar nga Prokuroria.
