Shefi i Shtabit Komunal të Aleancës Kombëtare për Integrim në Tetovë, Blerim Osmani, së bashku me bashkëpunëtorët Asafin, Belindën, Zehrën dhe Florinën, zhvilloi sot një takim me Polona Zajec dhe Mitra Jalali, përfaqësuese të Misionit të OSBE/ODIHR, të cilat po monitorojnë procesin zgjedhor për zgjedhjet lokale të 19 tetorit.
Gjatë takimit, Osmani i informoi përfaqësueset e misionit për sfidat dhe vështirësitë që mund të paraqiten gjatë procesit zgjedhor, duke theksuar shqetësimet lidhur me presionet e mundshme nga pushteti lokal ndaj bizneseve dhe qytetarëve që kanë bindje të ndryshme politike.
“Zgjedhjet e lira, të ndershme dhe demokratike janë themeli i një shoqërie të drejtë. Tetovarët duhet të kenë mundësi ta shprehin lirshëm vullnetin e tyre politik, pa presione dhe ndërhyrje,” deklaroi Osmani pas takimit.
Ai gjithashtu bëri thirrje për një proces zgjedhor të qetë, të dinjitetshëm dhe transparent, në përputhje me standardet demokratike dhe me respekt të plotë për të drejtën e qytetarëve për të zgjedhur lirshëm përfaqësuesit e tyre.
