Kryeministri Edi Rama, përmes një postimi në rrjetet sociale, ka folur për rritjen e pagës mesatare në vend, që sipas tij do të arrijë 900 euro vitin e ardhshëm.
Kryeministri liston një sërë arsyesh që kanë ndikuar në këtë rritje:
“Pagat e reja, falë të cilave paga mesatare në Shqipëri thuajse dyfishohet duke arritur majën historike të 900 Eurove në 2024, janë fryt i një përpjekjeje të gjatë, këmbënguljeje e durimi të madh për reforma të vështira e masa të domosdoshme për ekonominë dhe për financat tona, rritjeje të të ardhurave falë rritjes së ekonomisë, tregtisë, investimeve publike e private, rritjes së prodhimit e të eksporteve, modernizimit të sistemit të mbledhjes së taksave përmes kompjuterizimit të transaksioneve në kohë reale, lehtësimit e rritjes së shpejtësisë së shërbimeve për biznesin falë digjitalizimit të tyre, forcimit të shtetit në tërësi dhe uljes së ndjeshme të korrupsionit në tatime e dogana, po mbi të gjitha, pagat e reja janë fryt i punës sonë të përbashkët, të çdo shqiptari e shqiptareje, që në shtet a në privat, kontribuon për ekonominë shqiptare me punën e vet”.
Disa ditë më parë, kreu i qeverisë, njoftoi se është dakordësuar projektligji për rritjen e pagave, ku brenda një viti paga mesatare do të shkojë nga 563 euro në 900 euro.
Rama tha se me reformën e pagave do të rriten edhe pagat e pedagogëve me 20%, mësuesve të arsimit të mesëm, infermierëve dhe zjarrfikësve. Infermierët do marrin pagë bazë 87 mijë lekë, zjarrfikësit 80 mijë lekë, dhe mësuesit e arsimit të mesëm do të marrin një pagë prej 100 mijë lekësh.
Lexo edhe: Rriten pagat e administratës, Rama: Brenda vitit paga mesatare shkon në 900 euro
Top Channel
