Me një atmosferë festive dhe emocionuese, mbrëmja e fundit e Javës së Kosovës, e organizuar nga Shoqata “Shkëndia” në Zagreb, shënoi me madhështi 17-vjetorin e Pavarësisë së Kosovës. Ky event mblodhi një numër të madh bashkatdhetarësh që jetojnë dhe punojnë në Kroaci, të cilët, përmes artit, kulturës dhe fjalëve të ngrohta, shprehën lidhjen e tyre të pathyeshme me atdheun.
Në këtë tubim, përshëndetën me fjalë të përzgjedhura e Ngarkuara me Punë e Ambasadës së Shqipërisë në Kroaci, znj. Alma Kasa, Ambasadori i Republikës së Kosovës, dr. Martin Berishaj, si dhe kryetari i Unionit të Shqiptarëve në Kroaci, z. Esad Çollaku. Ata theksuan vuajtjet e popullit shqiptare ne Kosove dhe rëndësinë qe kishte UÇK ne arritjen e pavaresise se Kosoves. U theksua se eshte koha per bashkëpunim dhe ruajtje e identitetit kombëtar përmes aktiviteteve kulturore dhe sociale.
Një moment i veçantë i mbrëmjes ishte performanca e grupit të valleve të Shoqatës “Shkëndia”, të udhëhequr nga kryetarja e saj, znj. Gentiana Lleshdedaj. Me elegancë dhe pasion, vallet tradicionale shqiptare u interpretuan me një energji të jashtëzakonshme, duke sjellë para publikut një copëz të shpirtit shqiptar në zemër të Zagrebit.
Ky organizim, i cili përmbylli një javë të mbushur me aktivitete që promovojnë kulturën dhe historinë e Kosovës, shërbeu si një dëshmi e fuqisë së komunitetit shqiptar në Kroaci dhe e lidhjes së tij të fortë me vendlindjen. Me këtë mbrëmje të mrekullueshme, u konfirmua edhe një herë se kultura dhe identiteti ynë kombëtar vazhdojnë të ndriçojnë kudo në botë ku ka shqiptarë.
