Ministrja e Arsimit dhe Shkencës, Vesna Janevska, duke iu përgjigjur një pyetje të gazetarëve nëse ndoshta ajo do ta zëvendësojë Arben Taravarin në postin e ministrit të Shëndetësisë, pasi ky i fundit ka paralajmëruar largimin nga Qeveria, deklaroi se “Qeveria ka një kryeministër, dhe me gjasë edhe një ekip negociator – kjo është punë e tyre dhe ata do të thonë si do të jetë”.
E pyetur nëse do të pranonte një pozitë të tillë nëse do t’i propozohej, Janevska tha se është herët për të menduar për diçka të tillë.
– Është shumë herët për të menduar për një gjë të tillë, ata që janë përgjegjës do të thonë, dhe kur të vijë ai moment, atëherë do të bisedojmë – theksoi Janevska.
Deklaratën e Bilall Kasamit se sektori i shëndetësisë mund t’i kalojë VMRO-DPMNE-së, Janevska tha se e ka dëgjuar vetëm nga mediat.
– Si ministre e Arsimit kam aq shumë punë për të përfunduar, sa që me të vërtetë nuk mendoj dhe nuk jam e përfshirë në ato negociata. Sërish po e them, ka një person përgjegjës që do të vendosë se si duhet të jetë – nënvizoi ministrja.