Në rastin e fillimit të vitit të ri akademik 2025/2026, paralelja e vajzave e Medresesë “Isa Beu” në Tetovë u nderua me një vizitë të veçantë. Reisul ulema Shaqir ef. Fetai, i shoqëruar nga bashkëpunëtorët e tij të Rijasetit, Myftiu i Tetovës Dr. Hfz. Selver Xhemail dhe drejtori i përgjithshëm i Medresesë “Isa Beu” dr. Islam Islami, morën pjesë për të uruar nxënëset dhe stafin arsimor me rastin e nisjes së vitit të ri shkollor dhe njëherit edhe programin e ri pas akreditimit të Medresesë.
Delegacioni u prit nga koordinatori i paraleles së vajzave në Tetovë, Dr. Bekir Memeti, së bashku me stafin arsimor. Në këtë takim u theksua rëndësia e edukimit fetar dhe moral për gjeneratat e reja, duke i inkurajuar nxënëset që ta shfrytëzojnë këtë periudhë të formimit të tyre si një mundësi të çmuar për dijen dhe vlerat islame.
Reisul ulema Shaqir ef. Fetai, në fjalën e tij, shprehu kënaqësinë për sukseset dhe zhvillimet që ka shënuar Medreseja “Isa Beu” ndër vite dhe premtoi mbështetje të vazhdueshme institucionale për ngritjen e cilësisë së arsimit dhe kushteve të nxënësve.
Vizita përfundoi me urime të përzemërta për një vit akademik të mbarë, të frytshëm dhe plot suksese, duke e vendosur theksin tek rëndësia e bashkëpunimit midis institucioneve fetare dhe arsimore për rritjen e brezit të ri në frymën e dijes dhe moralit të lartë islam.
