Tema e djeshme ku u theksua se Albin Kurti nuk e pret Edi Ramën në takim pa mbaruar mbledhjen e dy qeverive, në një intervistë për mediumin “Gazetablic”, Ramiz Lladrovci kishte dhënë opinionin e tij që sot, është konfirmuar. Këtë e bëri të ditur ai me një postim në instagram, ku gjendet edhe vegëza e intervistës.
Lladrovci ka deklaruar se “Nga këto që i tha Kryeministri Kurti, është për t’u brengosur, siç duket, e kemi prek fundin, për keq, si komb. E para, marrëveshjet e përgatitura nga ministrat e dy qeverive, mund të nënshkruhen edhe pa u takuar dy kryeministrat. Kjo është brengosja dhe habia ime e parë, së dyti, kushtëzimi apo shantazhi që del nga kërkesa, është i padobishëm”.
Në fund të intervistës, Lladrovci ka deklaruar “Politika nuk është e shëndetshme për inatçorët apo për hakmarrësit. Politika i ka hatërmbetjet afatshkurtra, deri sa shfaqet problemi apo çështja më e madhe. Këto llogari e raporte duhet t’i njohin kryeministrat tanë. Por, është absurde që të kërkosh të llastohesh dhe kur bën ndërskamca. Shkurt, popullorçe, “nuk mund të jesh edhe djalë i kerrit, edhe dhëndër, edhe tupanxhi që dirigjon hapat e valles”. Bindja ime është se Kosova nuk e meriton të jetë dhe të trajtohet si mizë e kalit në rajon apo në Evropë”, ka deklaruar Ramiz Lladrovci, për Gazetën Blic.
