Deputeti i BDI-së, Blerim Bexheti, i ka kthyer përgjigje LEN, lidhur me “xhunglën” urbanistike, duke ia atribuar atij, si krijues i saj.
Qytetarët e dinë mirë: kush ka ndërtuar dhe kush ka gënjyer. Kush ka punuar dhe kush vetëm ka marrë, ka deklaruar Bexheti.
Postimi në fb i z. Bexheti:
Të flasësh për “xhungël urbanistike” në Shkup dhe të përpiqesh të ma adresosh mua, është po aq qesharake sa të fajësosh të tjerët për oborrin e shtëpisë sate të shkatërruar.
“Xhungla” e vërtetë urbanistike është në Komunën e Çairit – atje ku ka dhjetëra ndërtesa pa leje, kaos urbanistik, mungesë infrastrukture dhe plane që ekzistojnë vetëm në fjalime elektorale.
Mjafton një shëtitje e thjeshtë në Çair, ose një pyetje e sinqertë ndaj çdo qytetari, për ta parë me sy dhe për ta dëgjuar me vesh se kush e ka shndërruar komunën në një labirint betoni pa asnjë rregull.
Ne nuk e bëmë Çairin “xhungël”. Ata që për vite të tëra e sunduan si pronë private, sot duan të na japin leksione për qytetari dhe moral.
Në politikë, është e lehtë të akuzosh kur nuk ke asnjë pike pune për të mbrojtur. Por qytetarët e dinë mirë: kush ka ndërtuar dhe kush ka gënjyer. Kush ka punuar dhe kush vetëm ka marrë.
Fjalët ikin, faktet mbesin.
