Në një reagim publik, dega e BDI-së në Zhelinë ka ngritur alarmin për, siç thonë ata, presione të pushtetit në ikje mbi qytetarët që nuk u binden politikisht.
Sipas tyre, në orët e vona në objektet e komunës së Zhelinës zhvillohen takime mes kryetarit në ikje, komandantit të stacionit policor dhe militantëve partiakë, ku përmenden lista me emra konkret për shantazh dhe frikësim.
“Nëse këto zëra janë të vërteta, kemi të bëjmë me një skandal të papranueshëm dhe abuzim flagrant të pushtetit. Ne themi qartë, policia është e qytetarëve, jo e partive. Qytetarët e Komunës së Zhelinës nuk i frikëson askush. Shantazhi dhe presioni nuk do të ndalin ndryshimin që tashmë ka nisur”, thuhet në reagimin e BDI-së Zhelinë.
Ata theksojnë se Zhelina ka nevojë për zhvillim dhe dinjitet, jo për lista të natës dhe politika të frikës.