Grupi Parlamentar i “Frontit Evropian” në Kuvendin e Republikës së Maqedonisë së Veriut zhvilloi një takim zyrtar me Ambasadorin e Bashkimit Evropian në vend, Mihalis Rokas.
Në takim morën pjesë koordinatorja e grupit parlamentar, Rina Ajdari, deputeti Sali Murati, si dhe përfaqësues të Delegacionit të BE-së, përfshirë zëvendësambasadorin, funksionarë të lartë dhe këshilltarë.
Gjatë takimit u diskutua për aktivitetet e Grupit Parlamentar “Fronti Evropian” në Kuvend, qëndrimet politike të grupit, si dhe sfidat me të cilat përballen institucionet parlamentare dhe proceset legjislative në vend.
Vëmendje e veçantë iu kushtua propozim-ligjit për Përfaqësim të Drejtë dhe Adekuat. Përfaqësuesit e “Frontit Evropian” shprehën shqetësimet e tyre lidhur me mënyrën e përgatitjes dhe procedimit të ligjit, duke vlerësuar se procesi ka mungesë transparence dhe konsultimi me bashkësitë e prekura.
Sipas tyre, ligji nuk adreson në mënyrë të mjaftueshme parimet kushtetuese që lidhen me përfaqësimin e drejtë dhe adekuat, nuk përfshin mekanizma të qartë zbatimi dhe mbikëqyrjeje, si dhe nuk është harmonizuar plotësisht me rekomandimet e Komisionit të Venecias.
Përfaqësuesit e grupit parlamentar theksuan se zgjidhjet e propozuara mund të mos kontribuojnë në përmirësimin e pozitës së bashkësive etnike dhe kërkuan një proces më gjithëpërfshirës, transparent dhe në përputhje me standardet demokratike dhe kushtetuese.
Takimi u zhvillua në frymën e dialogut dhe shkëmbimit të mendimeve mbi proceset reformuese, funksionimin e institucioneve demokratike dhe rrugën evropiane të Republikës së Maqedonisë së Veriut.
