Pacientet e shtruara në Klinikën Universitare për Gjinekologji dhe Obstetrikë (GAK) janë ankuar për temperatura të papërballueshme, pasi klimatizatorët nuk kanë funksionuar prej disa ditësh. Nga klinika sqarojnë se nuk bëhet fjalë për defekt, por për një ndërprerje të përkohshme për shkak të ndërtimit të një salle të re operative.
Sipas drejtuesve të institucionit, sistemet e klimatizimit janë fikur përkohësisht gjatë realizimit të punimeve ndërtimore dhe vendosjes së kanaleve për furnizim me oksigjen në sallën e re operative.
Ndërkohë, një pjesë e stafit pohon se gratë shtatzëna janë detyruar të presin lindjen në kushte të vështira dhe temperatura shumë të larta.
Pacientet thonë se në repart janë të vendosura rreth 40 nëna dhe se nxehtësia brenda ambienteve është pothuajse e padurueshme.
Nga GAK, megjithatë, theksojnë se repartet e lindjes dhe dhomat ku qëndrojnë nënat nuk janë përfshirë nga ndërprerja e klimatizimit. Ata sigurojnë se puna në klinikë po zhvillohet normalisht dhe se klimatizatorët pritet të rikthehen në funksion duke filluar nga dita e nesërme.
