Sot, Kryetari i Ali Ahmeti, me përulësi dhe krenari kombëtare, mori pjesë në përkujtimin e 45-vjetorit të rënies heroike të Heronjve të Kombit, Tahir Mehës dhe Nebih Mehës, në Prekazin legjendar.
Në fjalën e tij, Ahmeti vlerësoi lart sakrificën dhe qëndresën historike të Tahir dhe Nebih Mehës, duke theksuar se akti i tyre heroik pas demonstratave të vitit 1981 u shndërrua në simbol të pathyeshmërisë së popullit shqiptar përballë pushtimit dhe padrejtësisë.
Ai theksoi se qëndresa e familjes Meha u bë frymëzim dhe betim për Komandantin Legjendar Adem Jashari, për Hamez Jasharin dhe për gjithë luftën çlirimtare të Kosovës, duke hapur rrugën drejt lirisë dhe dinjitetit kombëtar.
“Lavdia e Tahir dhe Nebih Mehës do të jetojë përjetë në historinë e kombit shqiptar. Sakrifica e tyre është themel i lirisë sonë dhe amanet për brezat që vijnë”, u shpreh Ahmeti.
Në përfundim të ceremonisë përkujtimore u bënë homazhe dhe u vendosën kurora lulesh në nderim të të gjithë dëshmorëve dhe heronjve të kombit shqiptar.
Ja postimi plotë:
Sot, në Prekazin legjendar, me përulësi e krenari kombëtare, nderuam 45-vjetorin e rënies heroike të Heronjve të Kombit, Tahir Meha dhe Nebih Meha, dy emra që u shndërruan në kushtrim lirie dhe në themel të qëndresës sonë kombëtare.
Pas ngjarjeve të mëdha të vitit 1981, kur rinia shqiptare ngriti zërin për liri e barazi, akti titan i Tahir dhe Nebih Mehës ishte mbështetja më e fuqishme e jehonës së demonstratave studentore dhe goditja më e rëndë kundër pushtimit jugosllav e serb. Ata dëshmuan se populli shqiptar nuk përkulet përballë dhunës dhe padrejtësisë.
Qëndresa heroike e Tahir dhe Nebih Mehës u bë betim i madh për Komandantin Legjendar Adem Jashari, për Hamez Jasharin, për Lagjen Jashari dhe për mbarë Prekazin heroik, betim që më pas u shndërrua në luftën çlirimtare dhe në rrugën tonë të pakthyeshme drejt lirisë dhe dinjitetit kombëtar.
Lavdi e përjetshme Tahir dhe Nebih Mehës!
Lavdi të gjithë dëshmorëve dhe heronjve të kombit shqiptar!
