Shoqata “Malësia” në Kaliforni ka përcjellë një mesazh të fuqishëm mbështetjeje për Kosovën në prag të ndeshjes së sontme, duke theksuar rëndësinë e unitetit dhe krenarisë kombëtare.
Përmes një reagimi publik, përfaqësuesit e shoqatës u shprehën se kjo natë nuk është thjesht një përballje sportive, por një moment që bashkon shqiptarët anembanë botës. Sipas tyre, zemrat e shqiptarëve rrahin njëzëri për Kosovën, duke reflektuar lidhjen e fortë shpirtërore dhe kombëtare me vendlindjen.
“Në fushë janë djemtë tanë, por pas tyre qëndron një komb i tërë,” thuhet në mesazhin e shoqatës, duke nënvizuar mbështetjen e palëkundur të diasporës.
Shoqata “Malësia” i ka bërë thirrje të gjithë shqiptarëve që ta bëjnë këtë natë të paharrueshme, duke qëndruar të bashkuar dhe duke mbështetur ekipin me krenari dhe besim.
Ky reagim është një tjetër dëshmi e rolit të rëndësishëm që diaspora shqiptare luan në ruajtjen e identitetit kombëtar dhe në përkrahjen e Kosovës në çdo arenë.
Forca Kosovë!
Ja postimi plotë:
Sonte nuk ka thjesht një ndeshje… sonte është një betim i heshtur i një populli që nuk është dorëzuar kurrë.
Anembanë botës ku ka shqiptarë sonte zemrat rrahin për një emër të vetëm – Kosovë. Për flamurin që valon me krenari, për historinë që po shkruhet me djersë dhe shpirt.
Në fushë janë djemtë tanë, por pas tyre qëndron një komb i tërë.
Le ta bëjmë këtë natë të paharrueshme.
Le të fitojë zemra, krenaria dhe besimi!
Forca Kosovë! 🇽🇰🇦🇱
Shoqata “Malësia” Kaliforni
