Më 15 janar 2026, Myftiu i Tetovës, dr. hfz. Selver Xhemaili, së bashku me bashkëpunëtorët e tij, me ftesë të Myftiut të Shkupit, dr. Qenan ef. Ismaili, mori pjesë në panelin shkencor të organizuar nga Myftinia e Shkupit, kushtuar ngjarjes madhore të Israsë dhe Miraxhit, nën udhëheqjen e Reisul Ulemas, h. hfz. Shaqir ef. Fetai.
Paneli mblodhi dijetarë, imamë dhe studiues nga vendi, duke ofruar një hapësirë reflektimi dhe diskutimi rreth dimensioneve shpirtërore, teologjike dhe edukative të ngjarjes së Israsë dhe Miraxhit.
Në kuadër të këtij aktiviteti, Myftiu i Tetovës, dr. hfz. Selver Xhemaili, prezantoi temën “Israja dhe mesazhi i saj”, ku theksoi se Israja, përveçse mrekulli hyjnore, përmban mesazhe të thella për besimtarin, duke nënvizuar rëndësinë e besimit të palëkundur, durimit në sprova, lidhjes ndërmjet tokësores dhe hyjnores, si dhe rolin qendror të namazit si dhuratë hyjnore për umetin islam.
Me këtë rast, Myftiu i Tetovës shprehu mirënjohjen për Myftiun e Shkupit, dr. Qenan ef. Ismaili, për ftesën dhe mikpritjen e ngrohtë.
