Pas Tiranës dhe Prishtinës, edhe Shkupi iu bashkua zërit të përbashkët për liri dhe drejtësi, duke u rreshtuar në mbështetje të kërkesës për çlirimin e ish-pjesëtarëve të UÇK-së. Kështu ka deklaruar lideri i Bashkimit Demokratik për Integrim, Ali Ahmeti, përmes një reagimi publik.
Ahmeti theksoi se shqiptarët, kudo që janë, kanë folur me një zë të vetëm, duke e cilësuar këtë moment si një thirrje të qartë politike dhe kombëtare për drejtësi.
“Shqiptarët folën njëzëri: është koha që djemtë tanë të kthehen në shtëpi. Në emër të popullit, djemtë tanë janë të pafajshëm dhe lufta jonë ka qenë e pastër”, ka deklaruar Ahmeti.
Sipas tij, lufta e Ushtrisë Çlirimtare të Kosovës ka qenë e drejtë dhe e shenjtë, duke nënvizuar se ajo përfaqëson një përpjekje të përbashkët të gjithë shqiptarëve, pa dallim moshe apo gjinie.
“Lufta e UÇK-së është e shenjtë dhe për këtë arsye, të gjithë burra e gra, të rinj e të moshuar jemi UÇK”, është shprehur lideri i BDI-së.
Në fund të reagimit të tij, Ahmeti ka përkujtuar dëshmorët e kombit ndër dekada dhe shekuj, duke theksuar vazhdimësinë e identitetit dhe qëndresës shqiptare.
“Lavdi dëshmorëve të kombit dhe e përjetshme shqiptaria”, ka përfunduar ai.
