Komuniteti shqiptaro–amerikan në New York do të shënojë nesër 113-vjetorin e Pavarësisë së Shqipërisë me një ceremoni zyrtare ngritjeje të flamurit kombëtar pranë monumentit të njohur Charging Bull në Wall Street.
Ngjarja, e cila do të zhvillohet në adresën 25 Broadway, pritet të mbledhë qindra pjesëmarrës dhe personalitete të ndryshme të jetës publike. Mes të ftuarve do të jetë edhe Kryetari i Bashkisë së Nju Jorkut, Eric Adams, i cili do të marrë pjesë në ceremoninë e flamurit bashkë me përfaqësues të komunitetit.
Ish-anëtari i Këshillit të Bashkisë së NYC-së dhe aktivisti i njohur i komunitetit shqiptaro-amerikan, Mark Gjonaj, u ka bërë thirrje shqiptarëve dhe miqve të Shqipërisë t’i bashkohen këtij momenti simbolik. Ai theksoi rëndësinë e ruajtjes dhe promovimit të vlerave kombëtare në diasporë, duke e cilësuar këtë ceremoni si një traditë të rëndësishme që bashkon komunitetin çdo vit.
Ceremonia do të nisë në ora 14:00, dhe është falas dhe e hapur për publikun. Organizatorët i kanë ftuar qytetarët të shpërndajnë njoftimin në rrjetet sociale për të rritur pjesëmarrjen.
