Deputeti i BDI-së, Ilir Hasani, ka marrë pjesë sot në konferencën e ODIHR-it me temë “Developing Parliamentary Integrity Standards: Spotlight on EU’s Eastern Partnership and OSCE Regional Perspectives”, e cila po zhvillohet në kryeqytetin e Armenisë, Jerevan.
Hasani u shpreh se pjesëmarrja në këtë aktivitet ndërkombëtar përbën një mundësi të rëndësishme për shkëmbimin e përvojave dhe praktikave më të mira në fushën e integritetit parlamentar dhe forcimit të institucioneve demokratike.
“Është frymëzuese të jesh i rrethuar nga kolegë, ekspertë dhe përfaqësues nga i gjithë rajoni, të cilët ndajnë të njëjtin përkushtim për promovimin e transparencës dhe integritetit në jetën publike,” deklaroi Hasani.
Ai theksoi se integriteti parlamentar është shumë më tepër sesa një çështje teknike, duke e cilësuar atë si themelin e besimit midis qytetarëve dhe përfaqësuesve të zgjedhur. Në kushtet kur skepticizmi ndaj institucioneve publike vazhdon të rritet, Hasani vlerësoi se diskutimet e kësaj konference janë “më urgjente se kurrë”.
Konferenca e ODIHR-it mbledh përfaqësues nga vendet e Partneritetit Lindor të BE-së dhe nga rajoni i OSBE-së, me fokus në zhvillimin e standardeve të integritetit parlamentar dhe forcimin e qeverisjes së mirë.
