Deputetja e Bashkimit Demokratik për Integrim, Rina Ajdari, ishte e pranishme mbrëmë në pritjen solemne të organizuar nga Ambasadori i Republikës së Shqipërisë në Maqedoninë e Veriut, Shkëlqesia e Tij z. Denion Meidani, me rastin e kremtimit të Ditës së Pavarësisë së Shqipërisë.
Në këtë ceremoni festive, të cilën e karakterizuan atmosfera e bashkimit kombëtar dhe respekti për historinë, deputetja Ajdari u bashkua me të ftuarit e tjerë për të nderuar flamurin shqiptar dhe për të kujtuar sakrificat e brezave që kontribuuan në lirinë dhe shtetformimin e Shqipërisë.
Ajdari vlerësoi rëndësinë e kësaj dite, duke theksuar se 28 Nëntori mbetet një prej simboleve më të forta të identitetit kombëtar dhe të aspiratave për zhvillim e prosperitet në mbarë hapësirën shqiptare.
Ceremonia e ambasadës mblodhi së bashku përfaqësues politikë, diplomatë, figura publike dhe përfaqësues të shoqërisë civile, të cilët nderuan këtë ditë historike për kombin shqiptar.
