Kryetari i Bashkësisë Fetare Islame të Maqedonisë së Veriut Reisu’l-Ulema H. Shaqir ef. Fetai, priti në kabinetin e tij Drejtorin e Përgjithshëm të Halkbankës në Shkup z. Fatih Shahbaz.
Në takim morën pjesë edhe Sekretari i Përgjithshëm i BFI-së Irsal ef. Jakupi, Koordinatori për marrëdhëniet me Republikën e Türkiye-së, Dr. Furkan Shaban si dhe Drejtori Ekzekutiv i Halkbank Shkup Muhammed Haxhipazi. Takimi u zhvillua në një atmosferë të ngrohtë vëllazërore, ku u diskutuan marrëdhëniet aktuale ndërmjet dy institucioneve si dhe perspektivat për bashkëpunime të reja.
Gjatë bashkëbisedimit, Reisu’l-Ulema Fetai shprehu mirënjohjen për partneritetin shumëvjeçar ndërmjet Bashkësisë Fetare Islame dhe Halkbankës, duke vlerësuar kontributet e rëndësishme që banka ka dhënë në mbështetje të aktiviteteve institucionale.
Fatih Shahbaz theksoi se për disa vite kishte ushtruar detyra të tjera brenda Halkbankës, duke rikujtuar se njohja e hershme me Reisu’l-Ulemanë ka kontribuar në forcimin e marrëdhënieve të ndërsjella. Ai shtoi gjithashtu se mysafirët nga Turqia, falë institucioneve të rëndësishme si BFI, ndihen të mirëpritur dhe si në shtëpinë e tyre, ndërsa konfirmoi gatishmërinë e Halkbankës për çdo formë bashkëpunimi në të ardhmen.
Takimi u përmbyll me shkëmbim dhuratash dhe urime të ndërsjella për vazhdimin e bashkëpunimit.
