Këshilltari i Qytetit të Shkupit, Abdulselam Selami, së bashku me kolegët Naimin dhe Daimin nga ekipi i AKI-së, ka zhvilluar sot një takim pune me Kryetarin e Komunës së Studeniçanit, Ejup Abazi, me fokus në çështjet më të ndjeshme që prekin banorët e kësaj komune.
Në takim u diskutua gjerësisht problemi i ujësjellësit, ku pavarësisht se banorët paguajnë rregullisht faturat ndaj NP “Ujësjellsi – Shkup”, ata vazhdojnë të përballen me mungesë të ujit. Selami theksoi se kjo situatë është e papranueshme dhe kërkon zgjidhje të menjëhershme institucionale.
Një tjetër temë e rëndësishme ishte deponia “Drislla”, e cila prej vitesh paraqet shqetësim serioz për mjedisin dhe shëndetin e qytetarëve, veçanërisht për fshatrat në afërsi të Batincës. Selami dhe ekipi i tij kërkuan që të merren masa mbrojtëse konkrete dhe të ndalet çdo rrezikim i mëtejshëm.
Abdulselam Selami deklaroi se angazhimi i tij dhe i ekipit do të vazhdojë pa ndërprerje, me qëllim që këto çështje të ngriten në Këshillin e Qytetit të Shkupit dhe të shtyhen për zgjidhje reale në dobi të qytetarëve.
“Zëri juaj në Qytet!” – mesazh i qartë nga Selami, i cili rithekson përkushtimin për transparencë dhe veprim konkret.