Sot, këshilltarët e Koalicionit Beslidhja Shqiptare – Aleanca Kombëtare për Integrim (AKI) morën zyrtarisht certifikatat nga Komisioni Komunal Zgjedhor, duke shënuar kështu edhe përfundimin e procesit zgjedhor përfaqësues në Këshillin Komunal të Kërçovës.
Me këtë rast, përfaqësuesit e AKI-së shprehën mirënjohjen dhe falënderimin e sinqertë për të gjithë qytetarët që u besuan dhe i mbështetën me votën e tyre. Ata theksuan se besimi i dhënë nga qytetarët është një përgjegjësi dhe obligim i madh për të punuar me përkushtim, transparencë dhe integritet në shërbim të interesave të komunitetit.
“Ne, përfaqësuesit e AKI-së në Këshillin Komunal të Komunës së Kërçovës, do të jemi zëri i qytetarëve, duke i përfaqësuar ata me dinjitet, profesionalizëm dhe përgjegjësi,” thuhet në reagimin e këshilltarëve të koalicionit.
Koalicioni “Beslidhja Shqiptare – Aleanca Kombëtare për Integrim” falënderon të gjithë votuesit për mbështetjen dhe besimin e treguar, duke u zotuar për një angazhim të pandërprerë në dobi të qytetarëve të Kërçovës.
