Pas përfundimit të tubimit madhështor të Aleancës Kombëtare për Integrim (AKI), kandidati për kryetar të Komunës së Tetovës, Bajram Rexhepi, ka shprehur mirënjohjen e thellë për përkrahjen e qytetarëve, duke e cilësuar natën si momentin ku u vulos fitorja për Tetovën.
“Faleminderit nga zemra Tetovë! Faleminderit njerëz të mirë që na hapët dyert dhe zemrat në çdo lagje e në çdo cep të qytetit. Sonte u vulos fitorja për Tetovën – fitorja e çdo qytetari që beson në dinjitet, zhvillim dhe një të ardhme të ndritur.”,shkruan Rexhepi.
Ai theksoi se më 19 tetor, qytetarët do ta japin vendimin përfundimtar përmes votës, duke e cilësuar Tetovën si një amanet të përbashkët që kërkon përgjegjësi dhe përkushtim.
“Tetova është amaneti ynë, dhe më 19 tetor, populli do ta japë përgjigjen e tij me votë dhe me krenari,” përfundoi ai.
Tubimi në Tetovë u shënua nga një pjesëmarrje masive, atmosferë entuziaste dhe thirrje për ndryshim, me moton #BashkëPërTetovën.
