Arsimi cilësor, inovacioni dhe zhvillimi i qëndrueshëm janë në qendër të vizionit të Belinda Amitit, e cila zyrtarisht kandidon për këshilltare komunale në Komunën e Tetovës nga radhët e Aleancës Kombëtare për Integrim.
Belinda Amiti është profesoreshë e kimisë në shkollë të mesme dhe asistente në lëndën e kimisë organike në Universitetin e Tetovës, me një përvojë të pasur akademike dhe angazhim të vazhdueshëm në edukimin e brezave të rinj. Ajo është doktorante në Fakultetin e Teknologjisë dhe Metalurgjisë në Universitetin “Shën Kirili dhe Metodi” në Shkup, duke dëshmuar përkushtimin e saj ndaj dijes dhe shkencës.
Me një profil profesional të fuqishëm dhe me një vizion të qartë për të ardhmen e qytetit, Amiti synon të jetë zëri i arsimit, inovacionit dhe rinisë në Këshillin Komunal të Tetovës.
“Unë besoj fuqimisht se arsimi është çelësi i çdo zhvillimi të qëndrueshëm. Tetova ka potencial të jashtëzakonshëm, veçanërisht tek të rinjtë. Detyra jonë është t’i mbështesim, t’u japim mundësi dhe të ndërtojmë politika që e forcojnë sistemin arsimor dhe zhvillimin e qytetit tonë,” – deklaroi Amiti.
Si pjesë e programit të saj dhe të Aleancës Kombëtare për Integrim, Belinda Amiti do të fokusohet në:
-Modernizimin e arsimit lokal,
-Fuqizimin e të rinjve dhe grave në vendimmarrje,
-Përmirësimin e kushteve në shkolla dhe qasje të barabartë në arsim,
-Zhvillimin e iniciativave për inovacion dhe teknologji,
-Nxitjen e bashkëpunimit ndërmjet shkollave, universiteteve dhe sektorit privat.
Ajo përfaqëson një brez të ri profesionistësh të angazhuar, të cilët e shohin politikën lokale si një mjet për të sjellë ndryshim të prekshëm dhe zhvillim real për qytetarët.
“Nuk mjafton të flasim për ndryshime — ato duhen ndërtuar me punë, ide dhe përkushtim. Unë jam e vendosur të jap kontributin tim për një Tetovë më të zhvilluar, më të drejtë dhe me më shumë mundësi për të gjithë,” – shtoi Amiti.
Me këtë kandidaturë, Aleanca Kombëtare për Integrim forcon angazhimin e saj për të sjellë në politikë profesionistë me integritet dhe vizion — njerëz që përfaqësojnë me dinjitet qytetarët dhe kontribuojnë në zhvillimin e komunës.
