Frashër Oseku
Intervista e Vasfije Krasniqit në TËVË1 është një prej atyre rrëfimeve që nuk të lë të njëjtë pas dëgjimit. Është ndryshe nga çdo tjetër, sepse rrëfehet nga një grua që nuk u dorëzua. Një grua që theu heshtjen në një shoqëri patriarkale, që e ktheu dhimbjen në guxim dhe guximin në forcë për të tjerët.
Vasfije është ndër zërat më të fuqishëm që sot i jep kurajo qindra viktimave të dhunës seksuale gjatë luftës në Kosovë. Ajo nuk e rrëfen vetëm dhunën – ajo e shndërron atë në motiv për ndërgjegjësim, për drejtësi dhe për dinjitet.
Në këtë intervistë prekëse, ajo ndan detaje nga fëmijëria, lidhja e veçantë me babain – një lidhje që e ka formësuar thellësisht në rrugëtimin e saj jetësor. Është pikërisht ajo marrëdhënie që i dha mbështetjen shpirtërore për të marrë vendimet më të vështira e më të guximshme.
Ajo flet për jetën, dhimbjen, dashurinë, ringritjen dhe përballjen. Dhe më e rëndësishmja – flet për të vërtetën.
Ne shqiptarët jemi me fat që kemi një heroinë si Vasfije Krasniqi. Jo vetëm për guximin që tregoi në rininë e saj, por për qëndrueshmërinë që sot frymëzon një popull të tërë.
Ju ftojmë ta ndiqni këtë intervistë. Është shumë më tepër se një rrëfim – është një akt trimërie.