Sot, më 14 shtator 2025, para namazit të drekës, në Xhaminë e Larme në Tetovë u organizua manifestimi i promovimit të hafizit më të ri nga qyteti i Tetovës, Hfz. Emre Metin Nesimi.
Në këtë manifestim morën pjesë Kreu i Bashkësisë Fetare Islame të RMV-së, Reisul Ulema H. Hfz. Shaqir ef. Fetahi, i shoqëruar nga nikoqiri i këtij manifestimi, Myftiu i Tetovës, Dr. Hfz. Selver ef. Xhemaili, Myftiu i Maqedonisë Lindore, Mr. Nasir ef. Rexhepi, shefi i kabinetit të Reis Ulemasë, Dr. Abdulkerim ef. Iseni, drejtori i sektorit fetaro-arsimor Mr. Fejzulla ef. Sadiki, drejtori i sektorit kulturo-shkencor Mr. Musanif ef. Rufati, profesorë, operativa e Myftinisë, hoxhallarë, familjarë, mysafirë dhe besimtarë nga qyteti e më gjerë.
Programi nisi me lexim nga hafizët e ardhshëm nga mektebi i xhamisë së Larme, ndërsa duaja e hifzit u bë nga shefi i kabinetit të Reis Ulemasë, Dr. Abdulkerim ef. Iseni. Biografia dhe përshkrimi i ecurisë së provimit për hafizin në fjalë u përcoll nga kryetari i komisionit të hifzit, Hfz. Emir ef. Kasami.
Fjalë përshëndetëse mbajti Myftiu i Tetovës, i cili lëvdoi hafizin duke theksuar mes tjerash se është një punë e madhe të reflektosh në librin e Zotit dhe të mësosh përmendësh atë, pavarësisht sfidave të kohës. Fjala e rastit i takoi Reisul Ulemasë, i cili vlerësoi lartë arritjen e hafizit të ri dhe tha se “Kur’ani udhëzon kah ajo që është më e drejtë dhe shpërblen ata që punojnë vepra të mira” (Kur’an, 17:9).
Në fund të ceremonisë, Hfz. Emre ef. Nesimi u nderua me çertifikatën e hifzit, një laptop nga ana e Myftinisë së Tetovës. Gjithashtu edhe muhafizi i tij, Zulqufli ef. Asllani, u shpërblye me mirënjohje dhe dhurata solemne.
Namazin e drekës e udhëhoqi Myftiu i Maqedonisë Lindore, Mr. Nasir ef. Rexhepi, ndërsa programi u moderua nga referenti i Myftinisë së Tetovës, Mr. Mahmud ef. Emini.
Mirënjohje të sinqerta për imamët e xhamisë Hfz. Abdulbaki ef. Kasami dhe Hfz. Emir ef. Kasami, këshillin e xhamisë dhe xhematin për pritjen e përzemërt dhe organizimin e këtij manifestimi të paharruar.
Urime hafizit të ri, urojmë që Allahu ta bekojë këtë hap të madh në jetën e tij dhe ta bëjë prej atyre që e jetojnë Kur’anin dhe që do të ringjallen me të, urime gjithashtu edhe familjes dhe gjithë besimtarëve të Tetovës për këtë arritje të begatë!
