Kryetari i Komunës së Kërçovës ka shprehur ngushëllime të sinqerta familjeve Abazi dhe Ramadani, të cilat humbën vajzat e tyre që kanë ndërruar jetë në rrethana tragjike, duke lënë pas një boshllëk të madh në familjet e tyre, në mesin e shoqërisë dhe në bankat e shkollës.
“Kjo humbje e parakohshme është plagë e rëndë për familjet e tyre, për gjithë Kërçovën dhe për shoqërinë tonë. Albina dhe Eriona lanë pas një boshllëk të pazëvendësueshëm në zemrat e të gjithëve”- ka shkruar Dehari.
Ja postimi i plotë:
Sot mbi Kërçovë ka rënë një heshtje zie.
Me dhimbje të thellë dhe zemra të tronditura morëm lajmin për ndarjen tragjike nga jeta të dy vajzave 16-vjeçare, nxënëseve të gjimnazit “Drita”, Albina Abazi dhe Eriona Ramadani, të cilat sapo po nisnin vitin e dytë në bankat shkollore.
Kjo humbje e parakohshme është plagë e rëndë për familjet e tyre, për gjithë Kërçovën dhe për shoqërinë tonë. Albina dhe Eriona lanë pas një boshllëk të pazëvendësueshëm në zemrat e të gjithëve.
Në këto çaste pikëllimi, bashkëndjejmë dhimbjen me familjet Abazi e Ramadani, me të afërmit dhe miqtë e tyre. Lutemi që Zoti t’ju japë forcë për ta përballuar këtë humbje të madhe.
Qoftë kujtimi i Albinës dhe Erionës i përjetshëm!
U prehshin në paqe.
