Kryetari i Parlamentit të Maqedonisë së Veriut, Afrim Gashi, edhe 48 orë pas skandalit me brohoritje anti-shqiptare në Kumanovë, në ndeshjen e basketbollit Maqedoni-Rumuni, nuk ka dalë me reagim dhe dënim të fyerjeve të shqiptarëve në praninë e kryeministrit Mickoski dhe dy ministrave, Stoilkoviq dhe Toshkovski, shkruan gazeta KOHA. Megjithëse reaguan të gjithë liderët e zyrtarët shqiptarë në Maqedoni, Kosovë…. madje edhe kryeparlamentarja e Shqipërisë, Elisa Spiropali, Gashit duket se nuk i kanë bërë përshtypje sharjet dhe ofendimet ndaj shqiptarëve në një ndeshje sportive që nuk kishte asnjë lidhje me shqiptarët. As në rrjetet sociale të kryeparlamentarit, por as në faqen e Parlamentit nuk gjendet ndonjë reagim apo dënim i thirrjeve nacionaliste ksenofobie të huliganëve maqedonas.
Ndryshe, dje – përveç ambasadorit të Shqipërisë, kundër thirrjeve antishqiptare në kor nga huliganët maqedonase në Kumanovë reagoi edhe kryetarja e Parlamentit të Shqipërisë, Elisa Spiropali.
-
“Ngjarja e fundit në Kumanovë, ku një ndeshje basketbolli u njollos nga thirrje ekstremisht fyese dhe përjashtuese ndaj shqiptarëve, është e papranueshme dhe një kujtesë se rruga drejt një shoqërie të drejtë, gjithëpërfshirëse dhe të respektit të ndërsjellë kërkon angazhim të pandërprerë. Gjuha e urrejtjes që nxit dhunën, konfliktin etnik dhe racizmin, nuk ka vend në asnjë hapësirë publike, e aq më pak në sport, që në thelb të tij mbart frymën e bashkimit, të bashkëpunimit, të lojës së ndershme dhe të respektit ndaj tjetrit. Vlerësoj reagimin e institucioneve të RMV, duke kërkuar njëkohësisht reagim edhe më fortë publik të zyrtarëve më të lartë të vendit mik”, reagoi Spiropali, ndërsa shtoi se “bashkëjetesa ndëretnike në Maqedoninë e Veriut është një vlerë e përbashkët në rrugën europiane, që duhet ruajtur dhe kultivuar me përgjegjësi nga të gjithë faktorët në rajon, përmes veprimit, qëndrimeve dhe shembullit”. (koha.mk)
