Qeveria e Maqedonisë së Veriut ka dalë sot me një deklaratë optimiste duke theksuar se ekonomia e vendit po përjeton rilindje, ndërsa rritja e Prodhimit të Brendshëm Bruto (PBB) ka arritur në 3.4% në tremujorin e parë të vitit 2025, sipas të dhënave preliminare të Entit Shtetëror të Statistikës, shkruan Flaka.
Sipas ekzekutivit, Maqedonia është tani në grupin e pesë shteteve me rritjen më të shpejtë ekonomike në Evropë, krahas Irlandës, Danimarkës dhe Polonisë. Qeveria e cilëson këtë si dëshmi të qartë të një transformimi ekonomik dhe të politikave të suksesshme në interes të qytetarëve.
“Shteti është në rrugën e ndryshimeve. Rritja dhe zhvillimi ekonomik janë prioriteti ynë më i madh,” thuhet në deklaratë.
Megjithatë, reagimet në opinion nuk kanë munguar. Qytetarë të shumtë shprehen se nuk e ndjejnë këtë rritje në jetën e përditshme.
“Po të ishte 3.4% më shumë në xhepin tim, do ta ndjeja,” thotë një qytetar i Strugës në rrjetet sociale.
“Statistika është e bukur, po buka është më e shtrenjtë,” komentoi një tjetër në rrjetet sociale.
“Unë jam në tremujorin e tretë të mbijetesës,” shton një tjetër komentues me ironi, që siç duket është pensionist.
Ekonomistë thonë se rritja e PBB-së nuk përkthehet automatikisht në përmirësim të standardit jetësor, sidomos nëse rritja ndodh në sektorë që nuk prekin drejtpërdrejt qytetarët, si ndërtimtaria apo eksportet industriale të huaja.
Ndërkohë, çmimet e produkteve bazë, qiratë dhe faturat vazhdojnë të rriten. Sipas disa analizave, shporta mujore vazhdon të jetë barrë për shumicën e familjeve, ndërsa pagat në sektorin publik dhe privat nuk po ndjekin të njëjtin ritëm.
Qeveria nga ana e saj paralajmëron një “transformim të plotë” dhe beson se rezultatet do të ndihen “shumë shpejt”, ndërkohë që qytetarët mbeten me shpresën… dhe faturat
