Kryetari i Komunës së Sarajit, z. Iljas Veseli, përmes një videoje të publikuar në profilin e tij zyrtar në Facebook, ka prezantuar për publikun punimet për përfundimin e parkingut të ri pranë objektit të Komunës.
Në video, Veseli thekson se punimet janë në fazën përfundimtare dhe shumë shpejt kjo hapësirë do të jetë në shërbim të qytetarëve. Ai gjithashtu falënderoi ekipet e angazhuara për dinamikën dhe cilësinë e punës së deritanishme.
“Ky projekt është pjesë e përkushtimit tonë për të përmirësuar infrastrukturën dhe kushtet për qytetarët e Sarajit. Parkingjet publike moderne janë të domosdoshme për funksionimin efikas të Komunës dhe shërbimeve që ofrojmë,” u shpreh kryetari Veseli.
Ky parking pritet të lehtësojë ndjeshëm mungesën e hapësirës për parkim në zonën përreth dhe të kontribuojë në rregullimin urban në Sarajit.
