Sot ka dhënë dorëheqje nga posti i zëvendës drejtori i Rrugëve Shtetërore, Nazim Taipi nga Aleanca për Shqiptarët, shkruan Top24
Të nderuar qytetarë dhe miq,
Ju njoftoj se sot kam marrë vendimin për të dhënë dorëheqjen time nga pozita e Zëvendësdrejtorit në Ndërmarrjen Publike për Rrugët Shtetërore.
Ky vendim vjen pas një reflektimi të thelluar dhe është i bazuar në bindjen time të palëkundur se nuk ekzistojnë më kushtet e nevojshme për të vijuar me një përfaqësim dinjitoz dhe të drejtë në këtë funksion.
Gjatë kësaj periudhe, kam punuar me përkushtim të plotë për të çuar përpara projekte strategjike si:
• Korridori 8 – përshpejtimi i procesit të shpronësimeve;
• Qarkorja Trebosh–Neproshten – nisja e punimeve intensive;
• Sinjalizimi i rrugës Tetovë–Jazhincë – projekt tashmë i përfunduar;
• dhe të tjera.
Megjithatë, kam hasur në sfida të vazhdueshme, përfshirë:
❌ zvarritjen e qëllimshme të proceseve, si në rastin e rrugës Tetovë–Prizren;
❌ mungesën e vullnetit politik për projekte në zonat me shumicë shqiptare, si autostrada Bllacë–Shkup;
❌ mosrespektimin e gjuhës shqipe në institucion dhe në komunikimin publik rrugor.
Shpreh mirënjohjen time të thellë për Kryetarin e Aleancës për Shqiptarët, z. Arben Taravari, për besimin dhe mbështetjen e dhënë.
Angazhimi im nuk përfundon këtu – përkundrazi, do të vazhdojë me përkushtim të plotë në mbështetje të vizionit dhe punës për një të ardhme më të mirë për shqiptarët.
Me respekt,
Nazim Taipi