Shkup, 13 Maj 2025 – Rektori i Universitetit “Nënë Tereza” në Shkup, Prof.dr. Bekim Fetaji, mirëpriti në kabinetin e tij të punës një delegacion nga Norvegjia, përfaqësues të organizatës ndërkombëtare Seed Forum Global, të kryesuar nga drejtori ekzekutiv, z. Jorund H. Rytman.
Gjatë takimit, rektori Fetaji prezantoi zhvillimet më të fundit të UNT-së duke vënë theksin në avancimin akademik dhe ndërkombëtarizimin e institucioneve të arsimit të lartë në Maqedoninë e Veriut. Ai theksoi gatishmërinë e UNT-së për të bashkëpunuar me partnerë ndërkombëtarë.
Seed Forum Global është një organizatë prestigjioze ndërkombëtare që synon të lidhë startup-et dhe sipërmarrësit me investitorë potencialë, përmes rrjeteve globale të prezantimeve dhe trajnimeve. E themeluar në Norvegji, ajo operon në më shumë se 40 vende dhe organizon ngjarje që kontribuojnë në zhvillimin e ekosistemit të inovacionit dhe investimeve në fazat e hershme të bizneseve.
Të dy palët shprehën interes të ndërsjellë për të formalizuar thellimin e bashkëpunimit, me synim arritjen e një marrëveshjeje zyrtare që do të promovojë kulturën e startup-eve dhe do të mundësojë përfshirjen aktive të studentëve dhe stafit akademik në projekte ndërkombëtare.
